Vieiros

Rifa de prazos aparte, o anuncio do Ministerio de Fomento de reservar un elevado investimento, 17 mil millóns de euros, dos cales un 70% será especificamente destinado á mellora de redes ferroviarias, é unha oportunidade perfecta para que Galiza reclame investimentos específicos que axuden a unha viraxe no modelo de mobilidade.

Así o entende o BNG, cuxo grupo parlamentario achega esta semana ao Parlamento unha iniciativa coa que instan a Xunta a iniciar coa maior brevidade posíbel as negociacións co goberno español "coa fin de comprometer unha cantidade mínima de 100 millóns de euros do chamado Plan Extraordinario de Infraestruturas do Ministerio de Fomento". A finalidade sería iniciar en Galiza "un servizo de cercanías eficaz e eficiente que permita no século XXI un modelo alternativo de mobilidade".

A proposición non de lei achegada pola deputada nacionalista Teresa Táboas argumenta a necesidade de medios de transporte alternativos á utilización do vehículo privado. "Somos conscientes de que o actual modelo de mobilidade está caduco dado o forte impacto para o medio ambiente, e economicamente tanto para o erario público como para os cidadáns", expón Táboas. Avalía o Bloque que a diferenza do custo de usar o vehículo propio respecto do transporte colectivo é dun 30%, polo cal toda actuación encamiñada a mellorar as infraestruturas de transporte público colectivo deberan ser "estratéxicas" e especialmente vencelladas ao tráfico ferroviario, debido á súa alta capacidade de transporte e a súa baixa incidencia no ambiente.

Na liña da reivindicación de 'Salva o Tren'
En apoio da iniciativa acudirán como oíntes ao Parlamento representantes da plataforma 'Salva o Tren'. Esta rede cidadá leva tempo mobilizándose a prol da creación dunha rede ferroviaria de proximidade e contra o levantamento dos treitos de ferrocarril que aínda quedan en diversos puntos do país e que facilitarían ese servizo.