Vieiros

A deputada do BNG Olaia Fernández Davila volveu solicitar no Congreso a recepción en Galiza das canles de televisión portuguesas a través da TDT. Recorda a nacionalista que este intercambio "reforzaría a normalización da lingua galega, ampliaría a oferta informativa, reforzaría os lazos culturais e sociais entre Galiza e Portugal, e, tanto para as televisións galegas como para as lusas, abriría unha importante oportunidade de negocio".

Fernández Davila lembra que a Carta Europea das Linguas Rexionais e Minoritarias estabelece que "as partes se comprometen a garantir a liberdade de recepción directa das emisións de radio e televisión dos países veciños nunha lingua usada nunha forma idéntica ou próxima dunha lingua rexional ou minoritaria, e a non se opor á retransmisión de emisións de radio e de televisión de países veciños nesta lingua".

Neste sentido, a deputada do BNG no Congreso sinala que xa hai varios países na Unión Europea que cumpren con esta norma, por exemplo, Finlandia, onde a poboación de fala sueca pode recibir as televisións da veciña Suecia.

• As televisións portuguesas chegarán en 2012 (21/11/2008)

• As televisións portuguesas en Galiza, a debate no parlamento español (12/05/2008)