Vieiros

Suspendem eleiçons às Juntas de Faculdade em contra dos Estatutos da USCMaio de 2007 Os órgaos reitores da USC venhem de suspender de maneira unilateral as eleiçons a representantes de alunado nas Juntas de Faculdade, num gesto de inequívoco despreço polas suas próprias normas de jogo que numerosas fontes consultadas entre professorado e alunado acham inaudito. Malia todo, a burocracia académica-política-mediática nom se tem feito eco do assunto.

Segundo os actuais Estatutos da Universidade, as Juntas de Faculdade som o órgao colegiado de governo e administraçom das faculdades e escolas, sendo de 30% a participaçom do estudantado permitida nas mesmas. Devemos reparar no artigo 98 do texto estatutário para acreditar a violaçom da normativa que supostamente rege o funcionamento da Universidade.
Colamos literalmente: Art.98.4º: Todos os representantes elixidos serano por dous anos, agás os estudantes, que o serán por un ano.

Além dumha linguagem sexista que exclui a representaçom feminina, o texto emprega a palabra "ano" ao referir-se ao estudantado, com o qual o período de representaçom das eleitas e dos eleitos em Maio de 2006 já estaria vencido e, portanto, extinguido o seu assento nas Juntas de Faculdade. É por isto que todos os cursos, chegada esta época, se convoca (se bem com pouco sucesso) o estudantado às urnas.

AGIR nunca participou duns órgaos cuja operatividade controlada externamente está mais que desprestigiada. Porém, sempre concorremos às eleiçons, quer de Claustro, quer das Juntas, chamando o estudantado a optar pola única candidatura (a da esquerda independentista) que ao longo da nossa breve história chamou ao boicote a través do voto em AGIR, tornando os postos que obtemos em espaços de representaçom vazios como estratégia de crítica à pseudodemocracia universitária.

Neste ano 2007, semelha que a penosa projecçom associativa dos CAF (colectivo hegemónico nas Juntas) e o desleixo governativo do paifoco de Senén, conjugárom-se em mais umha das tantas tramas mafiosas de reparto de poder às quais nos tenhem acostumad@s sectores docentes e estudantis que agem de monicreques dos interesses capitalistas e partidistas de PP-PSOE-BNG.

Tal e como se informa em documento oficial que anexamos afinal, a decissom foi respaldada por organizaçons estudantis, convocadas porém quando a suspensom já era efectiva. Numha manobra de elitismo consciente e intolerável, certos colectivos evidenciam a sua total e definitiva perda de respeito à comunidade estudantil. Cumpre salientar que AGIR, organizaçom estudantil consolidada e conhecida, que tem de resto representaçom nas Juntas, nom foi convocada nem fijo parte de nengum acordo. Para além da falta de responsabilidade que se tira dum comunicado oficial que tem mais mentiras do que palavras, AGIR deve denunciar que em nengum momento fomos consultad@s ao respeito desta medida, embora deveriamo-lo ter sido de confomidade com o texto. Repare-se em que a escusa empregue é a "impossibilidade material de contar com um censo eleitoral", que vem sendo como dizer que nom tenhem um fundo com os dados dos e das estudantes. De pena que nos tencionem enganar assim.

A nós, o estudantado da esquerda independentista, corresponde denunciar este facto. À espera de obter explicaçons mais satisfatórias sobre a suspensom das eleiçons (explicaçons que de cverto nom vam chegar), e à espera de conhecer a situaçom em que ficam as Juntas de Faculdade, AGIR convida o estudantado a potenciar o compromisso militante do estudantado mais conscientizado, assim como à participaçom nas Assembleias de centro que permitam paralisar o caldo de cultivo de trepas que som desde há vários lustros os órgaos "governo e administraçom" interna da USC.

Carta da Secretaria Geral da Reitoria: Santiago de Compostela, 4 de maio de 2007 Sres. decanos , decanas, directoras e directores de centros: Achégolles o seguinte acordo da Comisión Electoral Central: Reunida a Comisión Electoral Central o vinte e sete de abril de 2007 na sala de xuntas da reitoría co obxecto de tratar as vindeiras eleccións de representantes de estudantes nas xuntas de centro, e ante a imposibilidade material de contar cun censo electoral para a convocatoria en tempo e forma acordouse aprazar a convocatoria de eleccións de representantes de estudantes nas xuntas de centro. Infórmolles ademais de que os representantes das asociacións estudantís foron convocadas a unha reunión o día 4 de maio de 2007 onde os fixemos partícipes de dito acordo. De todas formas rogamos a máxima difusión entre os representantes estudantís da Xunta do seu centro. Un saúdo cordial e moitas grazas pola súa colaboración A Secretaría Xeral