Vieiros

A Audiencia Nacional concluirá esta semana o xuízo contra cinco directivos do diario Euskaldunon Egunkaria -Iñaki Uria, Martxelo Otamendi, Joan Mari Torrealdai, Txema Auzmendi e Xabier Oleaga- para os que a acusación popular representada polas asociacións Dignidad y Justicia e AVT piden penas de entre 12 e 15 anos de prisión por "integración en organización terrorista". A Fiscalía do Estado -que recoñeceu que non había probas de abondo- abstívose de presentar cargos.

Este luns desenvolveuse a cuarta sesión, logo do receso estabelecido en decembro, coas declaracións das testemuñas. O primeiro en declarar foi o catedrático da Universidade do País Vasco e accionista do diario José Ignacio Zabaleta.

"O PSE facilitou a participación do Goberno vasco"
O profesor universitario asegurou que foi o PSE que "rompeu o xeo" e conseguiu un acordo para que o Goberno vasco incorporase un representante no consello de administración do xornal. Ademais, insistiu en que ETA "nin influíu nin puido participar, nin participou nin llo permitimos".

Tamén compareceu o membro de ETA José Domingo Aizpurua Pitxas, que negou coñecer uns documentos incautados logo da súa detención no Estado francés en 1991 titulados Egunkaria Urriak 26 e 10-4 Azaroak 12, onde segundo a acusación popular se mencionaban a problemática de atopar un director para o xornal.

"En éuscaro e plural"
O xesuíta José Luís Zincunegi, foi superior de Auzmendi mentres este traballaba en Radio Herri Irratia, declarou que o acusado lle falara do proxecto Egunkaria e que o convenceran dúas cousas: que ía estar escrito en éuscaro e que iría destinado a todo o público e non a un sector determinado da poboación.

O xuízo renovarase o vindeiro mércores despois de que o presidente da Sala, Javier Gómez Bermúdez, suspendese a sesión polo falecemento da nai dun do letrados e quedará visto para sentenza nos próximos días.

• Anterior (20/12/2009): Milleiros de persoas arroupan nas rúas de Bilbo os imputados de 'Egunkaria'