Vieiros

O Arquivo Sonoro de Galicia, dependente do Consello da Cultura, publica unha escolma de audios de Ramón Piñeiro, homenaxeado este ano no Día das Letras. Os dez cortes, con licenza Creative Commons 3.0, abranguen intervencións do intelectual galeguista entre 1974 e 1988 en ámbitos diversos, como conferencias, faladoiros, entrevistas e o propio debate parlamentario da Lei de Normalización Lingüística de 1983. O Consello da Cultura Galega recupera, pois, deste xeito, a voz do que foi o seu primeiro presidente, entre 1983 e 1990.