Vieiros

O organismo popular anti-represivo Ceivar sacou á luz as agresións que está a sufrir o preso independentista Santiago Vigo no cárcere de Alcalá Meco, en Madrid. Segundo informou Ceivar, xa é a terceira agresión que padece o mozo, que se atopa no módulo de menores xunto a José Manuel Sanches por orde da Audiencia Nacional.

As agresións efectuáronas presos sociais do módulo, segundo Ceivar, ante a permisividade da dirección do centro e co acoso permanente do funcionariado, polo carácter independentista dos presos. Vigo e Sanches son os únicos ingresados de carácter político nun módulo onde se atopan máis de 50 presos sociais de diversas nacionalidades.

Ceivar anunciou que o seu avogado presentará unha denuncia no xulgado de Alcalá de Henares para que se depuren responsabilidades nas agresións, e que dous letrados irán visitar este sábado os presos para coñecer a súa situación dentro da cadea.